Frank & Carol

á Bold St. 1996. Úr 1. þætti; "Tímavillur"

---

Frank og konan hans ákváðu að fara að versla í Liverpool árið 1996.

Konu Franks langaði að kaupa sér bók í stóru bókabúðinni “Waterstones”, þannig að þau gengu af stað í áttina að henni.

Þegar þau komu að Bold Street ákvað Frank að kíkja í aðra búð fyrst, en hitti kunningja sinn á götunni og stoppaði í smá stund til þess að tala við hann þannig að konan hans fór á undan honum.

Eftir smá stund kvaddi Frank vin sinn, fór í búðina sem hann ætlaði í og sneri svo við til þess að finna konuna sína.

Þegar hann kom aftur að Bold street fór hann í átt að bókabúðinni, þegar hann nálgaðist búðina brá honum að sjá nafnið á búðinni, það stóð Cripps yfir hurðinni.

Þegar hann ætlaði yfir götuna til þess að kanna þetta betur þaut framhjá honum sendiferðabíll með áletruninni “Cardin’s” á hliðinni, ökumaðurinn flautaði á hann með gamaldags flautu og hélt áfram leið sinni.

Þegar Frank leit í kringum sig áttaði hann sig á því að hlutirnir voru ekki alveg eins og þeir áttu að vera.

Hann leit á bílana sem keyrðu framhjá og áttaði sig á því að þeir voru allir gamaldags frá 1950-60. Svo tók hann eftir fólkinu, mennirnir voru með hatta og sixpensara, konurnar voru með slæður, klæddar í löng pils og með gamaldags hárgreiðslur eins og þekktist eftir stríð.

Frank var farið að líða frekar óþægilega, hann hélt áfram yfir götuna og í átt að búðinni.

Þegar hann kom að búðinni sá hann töskur, skó og regnhlífar í glugganum. 

Skyndilega kom hann auga á unga konu sem stóð undrandi á svip við búðargluggan.

Konan var klædd í nútímaleg föt og þegar hún sá hann nálgast brosti hún til hans.

Frank fór inn í búðina og unga konan fylgdi honum eftir.

Þegar þau komu inn í búðina var Frank bæði hissa og feginn að sjá að búðin var aftur orðin að bókabúð.

Unga konan brosti til hans, hristi höfuðið og sagði “þetta var furðulegt, ég hélt þetta væri ný fatabúð!” og gekk svo út úr búðinni með furðusvip.

Frank var lögreglumaður á þessum tíma, maður sem var vanur að treysta á sönnunargögn.

Konan sem hann hitti þennan dag hefur seinna komið fram og staðfest sögu Franks, hún hefur einnig upplifað svipuð atvik á fleiri stöðum, aðallega í Liverpool en einnig í Tyrklandi.

Hún segist oft hafa séð eftir því að hafa ekki stoppað lengur til þess að ræða þetta atvik við Frank þennan dag 1996.

Cripps var kvenfataverslun og Cardin’s var vel þekkt fyrirtæki í Liverpool í kringum 50-60.

Hlustaðu á þáttinn okkar um Frank & Carol og tímavillur!